«Минек вейсэнь масторось – Россия!»: литературань час, конась алтави

И. А. Калинкинэнь чачома чистэнзэ саезь 80 иень топодемантень

Мокшэрзянь поэзиясь течис кадовкшны культурань сехте валдо пельксэкс. Кода бу аволь касово прозась, кодат бу эскелькст аволь тее драматургиясь, поэзиясь ульнесь ды карми улеме валонь творчествань зэмекс. А стяко мерезь: поэзиясь – народонть оймезэ.

Мокшэрзянь поэзиянтень покш путовксокс ловови Мордовиянь народной поэтэнть, Мордовиянь Государственной премиянь лауреатонть Иван Алексеевич Калинкинэнь творчествась. Те поэтэнть лемесь пек содавикс мокшэрзянь поэзиянь содыцятнень ды вечкицятнень ютксо. Сонзэ лемезэ сеедьстэ марсевицякс теевсь республикань томбалеяк: произведениянзо нолдавильть рузонь ды лия раськень кельтнесэяк. Сон дивавты ёжомарямотнень келейстэ панжомасонть, мельтнень-арсематнень весе оймесэ ёвтамосонть.

Иван Алексеевич Калинкин мокшэрзянь литературас сась ведьгеменьце иетнестэ. Касома ки лангсо сонензэ сехте покш нежекс ульнесть мокшэрзянь поэзиясь ды рузонь литературань художественной сюпавчись.

Сонзэ шкинемазо явови лиятнень эйстэ ды кеместэ сюлмазь эсензэ шкань ломантнень ды неень эрямонть марто. Нурькинестэ, поэтэнть седеесь а мери стувтомс улезенть ды а ютамс вадрянть, беряненть вакска. Ды те весе келейстэ ды домкасто панжови сонзэ важодематнесэ, конат алтазь эрьва кодамо событиятненень.

Иван Калинкинэнь стихотворениянзо, поэманзо, сонэтэнзэ тукшныть мельс неень шкань эрямонь смустенть невтемасо ды темань келейчисэнть, эрямосо одонть муемасонть ды кисэнзэ аштемасонть, гайгиця, ванькс эрзянь кельсэнть ды мазыйчисэнть. Сынь шныть важодиця ломаненть, тиринь масторонть ванстыцятнень, эйсэст морави вечкемань валдо ёжомарямотнеде, ояксчиде, маряви тердема пертьпельксэнь ваньксчинть кисэ аштемантень.

Сонзэ творчествасо васняяк каяты сельмс домка арсевксэсь, ёжомарямонь пштичись, поэтэнть улить эсензэ теманзо ды эсензэ героензэ, конат кеместэ сюлмавозь тиринь моданть марто. Кода свал, лирической геройдензэ верьга вайгельть апак пижне И. А. Калинкин машты невтеме поэтической талновтыця, мельстуиця валдо образт.

Поэтической касомань кись Иван Алексеевичень эрямосонть аволь шождаль. Сон вешсь ламо содамочи, эрямонь опыт, покш талант. Ды эрямонь киськак поэтэнть аволь видель ды аволь валаняль.

И. А. Калинкин чачсь 1935 иень июнень 23-це чистэ Ульяновской областень Инзенской райононь Чей велесэ. Тетязо, Алексей Степанович, чавовсь войнас. Сэстэ поэтэнтень ульнесь ансяк кавксо иеть. Авазо, Вера Семеновна, од шкасто пенсияс важодсь колхозсо. Эйкакшпингезэ ды мазый иензэ ютасть Покш Игнатовань Семеновка велесэ, мейле Коммунары велинесэнть. Тесэ кармась тонавтнеме начальной школасо, мейле – теке райононь Спасова велень средней школасо. Стихень сёрмадомо ушодсь котоце классо тонавтнемстэ. Иван Алексеевичнень лездась эрзянь келень ды литературань учителесь – Николай Иванович Ильин.

Вана сась армияв туемань шкась. Туемадо икеле чистэнть Калинкин ютнесь Пьяна леенть чирева, пиже тикшесэ вельтязь лайметнева, вирневанть, кузнесь ды валгонесь сонзэ латкотнева. Кузнесь Мурза пандонть пряскак. Тестэ таго неизе тиринь пертьпельксэнть. Талнось, токнось седеезэ ды чарькодсь: пингеде пингес явовсь эйкакшчистэнть. Кадык сон а шождаль, ялатеке питнеель ды а стувтовиця.

Стясь велем пес сэрейстэ Мурза пандось,

Мон течи кузнинь сонзэ шержей пряс.

Ванан, кись васов тусь эрямонть кандозь

Ды менельёнксонть экшес пезэ прась.

Мон ванды те кувака покш кияванть

Васов туезь, васень эскелькст теян.

Чачома ёнксом, тонь, прок тиринь авань,

Сэрей таркастонть икельдень неян...

Сюкпря тонеть, валдо чачома ёнксом,

Монь эйкакшчинь ды одксчинь чевте лавсь.

Косто саемс весе паронтень онксонть,

Конань вастомс менеленть ало савсь.

Армиясо валскестэ чокшнес савкшнось тонавтнемс солдатонь стакачитнень изнямо. Казармас сакшность истя сизезь, натой сельметнеяк конявить. Ды ялатеке ансяк прыль ютко шка, Иван Алексеевич саилизе тетрадензэ, совиль оймсема комнатас ды ушодыль стихень сёрмадомо, конат лакасть пряпотсонзо, гайгсть оймесэнзэ. Кучниль неть стихтнесэ Германиясто, косо служиль, эрзя-мокшонь масторов, «Советской Мордовия» газетав.

Служамсто Калинкин тееви «Советская Армия» ды «На страже Родины» газетань военкорокс. Неть газетатнесэ сеедьстэ лиснесть Калинкинэнь сёрмадовкстнэ. Армиясто кудов велявтовомадо мейле Иван Алесеевич сёрмадсь стихотвореният, корреспонденцият паксянь ды фермань важодицятнень тевдест ды кучнесь эйсэст райононь ды республикань газетатнес.

1956-це иень кизна Саранскойсэ кармась лисеме «Сурань толт» литературной журналось. Васенцекс эйсэнзэ печатазель Калинкинэнь «Почтальонка» стихотворениязо. Авторось лови, што эйстэнзэ ушодови литературас сонзэ кеместэ совамось.

Почтальонка

«Зоря» колхозонь велесэ

Эри эрзянь од тейтерне.

Сон прок тунда лей чиресэ

Уставна кудряв лейне.

Кенерсь умарькс якстердиця

Тейтерьканть мазый чамазо,

Лейнень ванькс веднекс чольниця

Сонзэ чевте кортнемазо.

Иван Алексеевич тонавтнесь Ардатова ошонь культпросветучилищасо, важодсь Ташто Чамза велень клубонь прявтокс, курок тердизь Покш Игнатовань райгазетань редакцияв. Те ульнесь 1959 иестэ. Колмо иень ютазь журналистэнь тевенть савсь кадомс. Игнатовань ды Орданьбуень районтнэнь вейсэндизь. Газетанть пекстызь. Те шкастонть Калинкин заочна прядызе Саранскоень кооперативной техникумонть планово-экономической отделениянть. Ансяк седеенть а манясак сонзэ ялатеке тердсь шкинемась. Ды зярдо Покш Игнатовань райгазетанть панжизь одс, Иван Калинкин апак кавтолдо ютась важодеме тов. Сон ладязель культурань отделэнь прявтокс.

1966 иестэ кучизь тонавтнеме Горький ошонь партийной школань журналистикань отделенияв. Тосо пурнызе стихень ды поэмань васенце пусмонзо. 1969 иестэ лиссь Мордовской книжной издательствасо «Зорянь мизолкст» лементь ало. Тезэнь совасть поэтэнть сехте паро произведениянзо.

Партшколань прядомадо мейле кавто иеть важодсь Покш Игнатовань райононь газетань редакторокс. Тосто ютавтызь «Эрзянь правдав» отделэнь прявтокс. Газетань тевтне вешсть ламо шка ды вийть. Вечкема стихтнень туртов кадновиль ансяк валскемартонь шкась ды оймсема читне. Ялатеке ульнесь сёрмадозь аволь аламо.

1972 иестэ лиссь поэтэнть «Маней пиземе» омбоце книгазо, иень ютазь – колмоцесь – «Сырнень сюлмо». Стихтнень тематикаст ульнесь келей ды эрьва кодамо. Вана эйстэст сехте вадрятнестэ вейкесь:

Минек вейсэнь масторось – Россия

Весень седейтнесэ эри свал.

Сонзэ ванькс мизолксонь эрексиясь

Эжди тиринь авань лембе валкс.

Но монень Россиянок ушоды

Горниповонь вайгель Сура лей.

Чиресэнзэ, прок од тейтерь, коды

Черьбулонзо ашназа килей.

Вечкан, зярдо мацейть ливтить алга,

Суранть пелев коштканть кист кирдить.

Сынь, прок умонь эйкакшпорань ялгат,

Вейс пурнавозь эсь мельгаст тердить.

Ды лаки сестэ оймем истяня –

Оям ютксо бажан улемс.

Покш эрямонь янось а валаня,

Вейсэ седе шождыне молемс.

Саранск ошсо поэтэсь кармась вастневеме мокшэрзянь литературасо содавикс ломантнень марто. Шкинемадо кортамотне, сынст превс путоматне ульнесть тензэ алкуксонь школакс. Те сёрмадейтне Андрей Куторкин, Никул Эркай, Александр Щеглов, Василий Коломасов, Иван Пиянев ды лиятне. 1976-це иень февральстэ Иван Алексеевич Калинкинэнь саизь СССР-нь Писателень вейспурнавксос. Рекомендациятнень максокшнынзе тензэ Кузьма Абрамов ды Александр Мартынов. Кенярксось покшоль. Сонзэ шкинемантень покш питне максть масторонь сех содавикс сёрмадейтне.

– Теде мейле мон теке од эрямо ушодынь, – кортась Иван Алексеевич. – Важодинь «Сятко» журналонь литсотрудникекс, ответственной секретарекс, Мордовиянь Писателень вейспурнавксонь литконсультантокс, 1977-це иестэ июньстэ аравтымизь «Сятко» журналонь прявт редакторокс. Сисем иень перть топавтынь те тевенть, топавтовлинь паряк товгак, ды 1984-це иестэ кочкимизь Мордовиянь Писателень вейспурнавксонь прявтокс. Кандынь те канстонть кеветее иеть!

Седе тов Иван Алексеевичень стихензэ лиснесть «Сятко» журналсо, «Эрзянь правдасо», Мордовской книжной издательствасо – «Лёмзёркс чире» (1977), «Отцовский характер» (1979), «Витькстамо» (1981), «Пиче вирь» (1985), «Цветы дружбы» (1988), «Кизэнь менель» (1992), « Надежда» (1995) пусмотне.

Московсо «Современник» издательствасо лиссть стихотворениянь пусмотне «Черемуховый берег» (1983) ды «Зеленые костры» (1986). Пусмотнесэ рузонь кельс стихотворениятнень ютавтызь Виталий Юшкин, Александр Терентьев ды лиятне. Истя жо Иван Алексеевичень произведениянзо печатазельть «Песни с берегов Суры и Мокши» (1988) ды «Колесо» вейсэнь пусмосо. Рузонь кельс ютавтозь стихензэ лиснесть «Литературная газета», «Литературная Россия» газетатнесэ ды «Наш современник», «Дружба народов», «Нева», «Волга», «Огонёк» журналтнэсэ. Седеяк ламо ловныцят кармасть содамо шкинеманзо.

«Ава ды лей» (1995) стихсэ романось, невти эрзянь велень ломантнень эрямост войнань васенце читнестэ саезь вейксэньгеменце иетнень прядовомс. Произведениянь геройтне – велень важодицят, модань сокицят, сюронь кастыцят. Сынст бажамост, кенярксост, талномаст малавикст авторонтень.

«Дорогами испытаний» (1995) ды «Верность Родине» (2003) книгатнесэ пурназь очеркть Великой Отечественной войнань геройтнеде ды тылсэ важодицятнеде. Ламо стихть поэтэсь алтась тюремань паксясо маштовозтненень.

Солдатонь калмо

Пулясь сусксь солдатонь мештес,

Прась ломанень верень валозь.

Шкась моли… Ды валдо теште

Те таркасонть ашти, палозь.

Сёрмадозь алянть лемезэ

Обелискень покш мештесэнть,

Ды палы, эри оймезэ

Вете уголонть тештесэнть.

«Васоло ки лангсо» повестесь лиссь 2000 иестэ. Сон алтазь шофертнэнень, кить ускить эрьва кодамо парочи масторонь вельть ламо таркав. Эряви сеске меремс, тиринь литературасонок зярс киненьгак эзь невтеве истя весеме ёндо цела бригада неть вейсэ роботыця ломантнень а шождыне эрямонь аштемань лувост. Повестесь туи мельс, васняяк, вана мекс: произведениянь геройтне, конатне кемекстыть эсь обуцяст тевсэ ды марить пряст масторонтень эрявикс ломанекс, тердить а пелемс эрямонь стакачитнеде, ды теке марто — путомс виде питне эсь прянь ветямонтеньгак.

2005-це иестэ Мордкизсэ лиссть И. Калинкинэнь колмо томсо кочказь произведениянзо. Васенце томонтень совасть стихотвореният, «Кискань эрямо» повестесь ды «Уцяска» очеркесь; омбоце томсонть — поэмат ды «Ледстнемань васолкст» сонетэнь каштазось; колмоцесь ашти «Ава ды лей» стихсэ романстонть.

Истя жо лиссть рузонь кельсэ 2007 иестэ рузонь кельс ютавтозь «Избранные произведения» колмо томсо книганзо.

2008 иестэ лиссь «Палыця иетнень толбандянть вакссо» книгась. Тезэнь совасть од стихотворениянзо, конат сёрмадозельть меельце иетнестэ, поэмат, ёвтнемат, очеркть. Ловныцясь вастови книганть совавтозь «Оянь седей», «Лембе валдо», «Ёвтамо Пуркаев генералдонть», ды эрзянь кельс ютавтозь татаронь поэтэнть Хади Такташонь «Вирень тейтерь» поэматнень героест марто. Покш тарка книгасонть явозь «Лембе валонть виезэ» ёвтнемантень ды тиринь раськень содавикс писательтнеде очерктненень.

Весемезэ Иван Алексеевич сёрмадсь комсь стихень ды поэмань книгат, конатнень эйстэ вейксэтне ютавтозельть рузонь кельс. Иван Алексеевич сонськак ютавтьнзe эрзянь кельс Михаил Светловонь, Валентин Ермаковонь, Виктор Агаповонь, Михаил Исаковскоень, Тарас Шевченконь, Павел Тычинань ды лиятнень cтиxест.

Иван Алексеевичень ламо cтиxензэ лангс сёрмадозь музыка. Истя Россиянь содавикс композиторонть Александр Аверкин марто сёрмадызь «Край родной – Мордовия моя» моронть. Вана уш 20 иень перть сонзэ морсить кода профессиональной артиcтнэ, истя самодеятельной коллективтнеяк. «Умарина» ансамблянть репертуарсо «Тундонь вастома» морозо.

Иван Алексеевичень творчествантень путозь покш питне. «Пиче вирь», «Цветы дружбы», «Песни с берегов Суры и Мокши» стихень пусмотнень кис поэтэнтень максозь Мордовиянь Государственной премиясь, сон казезель Республикань Верховной Советэнь ды Мордовия Республикань Почётонь грамотатнесэ. Кандтнесь «Мордовия Республикань Народной поэт» ды «Российской Федерациянь культурань заслуженной роботник» почётонь лемтнень, максозель тензэ «Знак Почёта» орденэсь.

Сёрмадеенть весе шкинемазо сюлмазь чачома-касома ёнксонть марто, сон тонавты одтнэнь вечкеме тетянь-авань моданть, паксятнень, лаймотнень, виртнень. Тиринь ёнксось цецякс панжови, бути эрьвась эйстэнек карми оймень путозь важодеме эсензэ таркасо. Иван Алексеевич Калинкин тонавты вечкеме пертьпельксэнь эрьва лопиненть. Секс поэтэсь невти ломаненть мастор лангонь азорокс, произведениянзо эрьва ёндо сюпалгавтызь эрзянь ды мокшонь поэзиянть.

Кулось Иван Алексеевич июнень 14-це чистэ 2012 иестэ.

Материал подготовила В. Б. Бояркина, гл. библиотекарь отдела национальной и краеведческой литературы НБ им. А. С. Пушкина РМ.